आनंदाची अमेरिका वारी

काही काही मडंळी एकूणच धडपडी असतात. आपली नोकरी-व्यवसाय सांभाळून त्यांचे काही ना काही उद्योग (चांगल्या अर्थाने) सुरू असतात. लोकांच्या दृष्टीने ते काम म्हणजे लष्कराच्या भाकऱया भाजणे असे असले तरीही एकूण समाजासाठी अशी माणसे आणि त्यांच्या अशा प्रकारच्या सामाजिक कामाची आवश्यकता असते. त्यापासून काही जणांना प्रेरणा मिळते, महाविद्यालयीन विद्यार्थी किंवा युवकांमध्येही जबाबदारीची जाणीव निर्माण होऊन काहीतरी करण्याची उमेद किमान मनात तरी येते. असेच एक हरहुन्नरी व्यक्तिमत्व म्हणजे डॉ. आनंद हर्डीकर. डोंबिवलीतील आपला दवाखाना आणि हॉस्पीटल सांभाळून ते समाजोपयोगी कामे सतत करत असतात. त्यांचा हा उत्साह सर्वानाचा प्रेरणदायी असतो. डॉक्टर गेल्या वर्षी अमेरिकावारी करून आले. आपल्या या अमेरिकावारीचे पुस्तक त्यांनी लिहिले आहे. डॉक्टरांनी लिहिलेल्या आनंदाची अमेरिका वारी या पुस्तकाची दुसरी आवृत्तीही प्रकाशित झाली आहे.
हे पुस्तक वाचकांना घरबसल्या अमेरिकेची वारी घडवून आणणारे असून सोप्या आणि ओघवत्या भाषाशैलीमुळे वाचनीय झाले आहे. मला या पुस्तकातील डॉ. हर्डीकर यांनी त्यांच्या वडिलांविषयी(वामन शंकर हर्डीकर) लिहिलेले समर्पण हे प्रकरण अधिक भावले.वडीलांनी केलेले संस्कार व त्यांच्या एकूण व्यक्तीमत्वाचे विविध पैलू डॉक्टरांनी फार छान उभे केले आहेत. त्यातून डॉक्टरांवर लहानपणापासूनच कसे संस्कार झाले व समाजासाठी काहीतरी केले पाहिजे, हे बाळकडू कसे मिळाले हे कळते. या समर्पण मधील काही वाक्ये जशीच्या तशी डॉक्टरांच्याच शब्दात (त्यांच्या वडीलांविषयीची)
मी डोंबिवलीत दवाखाना सुरू कऱणार असे कळल्यावर तू तिकडे समुद्रावर घागरी ओतशील, पण येथे चमचाभर पाण्यासाठी तडफडणाऱया लोकांना (औषध) पाणी कोण देणार, असा जाब विचारणारे तुम्ही,
मी नोकरीच्या दुसऱया वर्षीच घेतलेली माझ्या दारातील गाडी पाहून, एक खडू आणून तुझ्या बंगल्याच्या भिंतीवर, सामान्य माणसांचा पैसा उड्या मारतो, असे मोठ्या अक्षरात लिही, असे सांगणारे तुम्ही,
माणूस सुखासाठी पैसा मिळवतो आणि सुख सोडून पैशांच्याच मागे लागतो, असे वास्तव सांगणारे तुम्ही,
जेव्हा टोकाची मतभिनन्ता होते. तेव्हा जागा बदलून पाहा (समोरच्याच्या जागी तू असतास तर तू काय केले असतेस) असा मंत्र देणारे तुम्ही
गावी घरात ट्युबलाईट लावण्यासाठी धाकटा भाऊ प्रमोदने पुण्याहून पाठवलेले पैसे पंढरपूरला दुष्काळग्रस्त गाईच्या चाऱयासाठी पाठवून देणारे तुम्ही
गावामध्ये पोस्टाची सोय नाही म्हणून मुंबई-गोवा महामार्गावर पोस्टाचा आंधळा कारभार असा फलक लावून समस्येला वाचा फोडणारे आणि गावासाठी पोस्ट मिळवून देणारे तुम्ही
अशा अनेक प्रसंगातून आणि उदाहरणातून डॉ. आनंद हर्डीकर यांनी आपल्या वडिलांचे व्यक्तीमत्व उभे केले आहे.
डॉक्टरांची ही अमेरिका वारी १४ मे ते १५ जून २००८ या कालावधीत झाली होती. पूर्वरंगमध्ये डॉक्टरांनी अमेरिकावारी कशी ठरली, त्यानंतरचे व्हीसा व अन्य सोपस्कार या विषयी लिहिले आहे. त्यानंतर १४ मे ते १५ जून या कालावधीतील रोजच्या दैनंदिनीतून डॉक्टरांची ही अमेरिकावारी उलगडत गेली आहे. सॅनफ्रान्सिस्को, व्हाया लास व्हेगास, लास व्हेगास ,स्वप्ननगरी, अफलातून युनिव्हर्सल स्टुडिओ अशा प्रकरणातून अमेरिकेतील प्रवासाचे अनुभव डॉक्टरांनी सांगितले आहेत.
हे पुस्तक अवघ्या ८४ पानांचे आहे. त्यामुळे एका बैठकीत ते सहज वाचून होते. अमेरिकावारीतील भरपूर छायाचित्रेही या पुस्तकात आहेत. हे केवळ प्रवासवर्णन नाही तर डॉक्टरांनी आपले परिचित, नातेवाईक, मुले आणि एकूणच अमेरिकेतील जीवन, तेथील राहणीमान, वाहतूक व्यवस्था, तेथे नोकरीच्या निमित्ताने गेलेली भारतीतील तरुण मुले, त्यांचे विश्व, प्रवासातले अनुभव या विषयी सविस्तर लिहिले आहे. हे सर्व वाचताना आपण अगदी गुंगून जातो आणि डॉक्टरांबरोबर आपलीही अमेरिकावारी घडते. कोणाला अमेरिकेत जायचे असेल तर काय काय काळजी घ्यायची, काय अवधान बाळगायचे त्याचेही मार्गदर्शन मिळते.
डॉ. आनंद हर्डीकर यांचा ईमेल
avhardikar@yahoo.com
मोबाईल क्रमांक-९२२४१५२७९२